Darjeeling-ah bandh thlahdul

Gorkha Janmukti Morcha (GJM)-te’n West Bengal aṭanga Gorkhaland state hran phuta Darjeeling hill district-ah ni 78 chhung nawrh an huaihawt hnuah, nimin aṭang khan ni 12 chhung atan bandh hi thlahdul lailawk a ni.

GJM convenor Binay Tamang chuan West Bengal sorkar nena inbiakna an neih leh hma, ni 12 chhung chu bandh hi thlahdul a nih tur thu a sawi. Nimin zing aṭang khan dawr, office, school leh tea garden-te pawh hawn nghal an ni a, motor-te pawh an tlanchhuak a ni.

GJM leh state sorkar aiawhte chuan September 12 hian inbiakna an nei leh dawn a, an inbiakna hi a hlawhtling lo a nih chuan hemi ni vek hian meeting neiin, bandh huaihawt chhunzawm tur nge, kawng dangin hma an la dawn tih an rel nghal dawn niin, Tamang chuan a sawi.

Bandh thlahdul tura meeting neihnaah hian GJM hotu lu ber Bimal Gurung chu a tel ve lo a, mahse an thutlukna siam chu hriattir a ni dawn tih a sawi. Hetih lai hian GJM general secretary Roshan Giri chuan bandh chu chhunzawm zel a nih tur thu a sawi thung. Giri chuan,”Gurung chuan nawrh huaihawt hi chhunzawm zel turin a ti a, hei vang hian sut a ni dawn lo”, a ti.

Tamang leh Gurung inkarah hian inhriatthiam lohna lian tak a awm a, hei hi chingfel turin an pawl hotute pawhin an duh tih an sawi bawk.