JD(U)-in Sharad Yadav hnawhchhuah tum

Bihar-a rorellai, Janata Dal (United) chuan an party laka hel, hruaitu hlun Sharad Yadav chu party aṭanga hnawhchhuah a tum nia sawi a ni.

JD(U) national general secretary Sanjay Jha chuan Yadav-a hnenah hian an party chuan lehkha thawnin, Lalu Prasad-a’n rally a huaihawt­naah tel lo turin an ngen a, a tel lui a nih chuan JD(U) a chhuahsan tih lanna angah an ngaih tur thu hrilh a ni, a ti. Mahse he rally-ah hian Sharad Yadav hi a tel bakah thu pawh a sawi a ni. Sharad Yadav hian CM Nitish Kumar-a’n RJD, JD(U) leh Congress party thawkho ten Grand Alliance hnuaia ṭangrual sorkar an siam chhuahsan a, BJP thawhpuia sorkar thar a siam avangin a lungawi lo hle a ni.