Ram danga tangkhangte hruai haw dawn

Sorkar laipui chuan hri leng vanga ram hrang hranga India mi tangkhang mekte chu naktuk aṭangin hruai haw a tum. 

Foreign ministry chuan a thawh khatna atan ram 13-a India mi tangkhang, mi 14,800 te hi flight 64 hmangin hruai haw phawt an ni dawn tih a sawi. Hei bakah hian Maldives leh West Asia rama tangkhangte  hruai hawna turin Navy lawng pathum tirh a ni bawk ang. 

Naktuk aṭangin India mi hruai haw tur hian US, Phi­lippines, Singapore, Bang­ladesh, UAE, UK, Saudi Arabia, Qatar, Singapore, Phillippines, Oman, Bahrain leh Kuwait-ah te thlawhtheihna hi tirh a ni dawn. Thlawhtheihnaah hian pawh hian social distancing kalpui vek a ni dawn a, hei vang hian flight pakhatah mi 200-300 vel an chuang thei dawn a, hruai haw turte hian an hriselna dinhmun dik tak an sawilan hmasak phawt a ngai dawn a ni. 

Tangkhangte hruai hawna tura flight 64 tirh tur zinga flight 15 hi Kerala aṭangin a chhuak dawn a, Delhi leh Tamil Nadu aṭangin flight 11 ve ve, Maharashtra leh Telangana aṭangin flight pasarih ve ve bakah, state dang panga aṭangin tirh an ni ang. 

Mi 14,800 tangkhang mekte hi May 7 - 14 inkar chhungin hruai haw tum an ni. Sorkar chuan lockdown zawh hnuah tangkhangte hruai  haw tur hian nasa zawka hma lak zui a tum  tih sorkar official chuan a sawi.