Sorkarin sum a la ruahman tam tawk lo : Abhijit Banerjee

Economist Abhijit Banerjee leh Congress hruaitu Rahul Gandhi chuan nimin khan video conference an nei dun a, he hunah hian Abhijit chuan Covid-19 hri do nan hian sorkar chuan sum a la hman tlem thu a sawi.

US, Japan, Europe leh khawvel ram hrang hrangte chuan he hri dona kawngah hian sum leh pai ṭhahnem tak an thehchhuak tawh a, an ruahman sa bak pawh an pek belh zel bawk.  

Abhijit chuan hri do nan hian India sorkar chuan Gross Domestic Product (GDP) aṭanga 1% vel chauh a la hman thu sawiin, US chuan an GDP aṭanga 10% vel an hman tawh thu a sawi.

Abhijit leh Rahul hi Covid-19 hri leng vanga India rama economy-in harsatna a tawh dan an sawi dun  ni. Rahul chuan mipuite hnena pawisa pek chungchang a sawipui a, Abhijit chuan ramchhunga mi rethei zawkte hnenah pawisa hi pek a hun thu leh, India rama cheng 60% chu mi rethei an nih thu a sawi lang. 

Chhawmdawlna pek tur chin hi sorkar chuan uluk taka a bithliah a ngai tiin Abhijit chuan a sawi a, mi rethei zawkte pawisa pek hian nakin atan a chhe zawnga nghawng a neih theih a rin loh thu Abhijit chuan a sawi bawk a ni. 

Hri vanga hun harsa tawh lai hian temporary ration card sorkarin a siam a ṭul tih Abhijit chuan a sawi a, tute pawhin he ration card hi an neih theih nan sorkar chuan ngaihtuah se a duh tih a sawi bawk. Ramchhunga hri leng vang hian sumdawnna kawngah hma lak a harsa hle a, hei vang hian India rama sumdawng, a bik takin sumdawng tenaute chuan harsatna nasa zawk an tawk mek a ni. Heng mite khaihchhuah nan hian Abhijit chuan pawisa tam tak tak mamawh a nih thu a sawi.

Kar liam ta khan Rahul chuan RBI governor hlui Raghuram Rajan pawh a lo kawm tawh bawk. Rajan chuan India-a mi rethei zawk te ṭanpui nan Rs vaibelchhe 65,000 mamawh a nih thu a lo sawi tawh bawk a ni.