Modi-a cabinet siksawi, minister-ah mi 9 lalut thar

Prime Minister Narendra Modi-a Council of Minister chu nimin khan siksawi a ni a, mi­nister atan mi pakua lakluh thar niin, minister ṭanglai pali-te chu cabinet rank-ah hlankai an ni.

Kum 2014-a National Democratic Alliance (NDA) sorkar a din hnua cabinet siksawi ṭum thumna a ni a, minister tharte hi nimin khan rinawmna thu thiam tira lakluh nghal an ni.

Minister atana lakluh thar mi pakua-te chu - RK Singh, Hardeep Singh Puri, Shiv Pratap Shukla, Satyapal Singh, Alphons annanthanam, Ashwini Kumar Choubey, Anant Kumar Dattatreya Hegde, Gajendra Singh Shekhawat leh Virendra Kumar-te an ni. Cabinet rank-a hlankaite chu - Dharmendra Pradhan, Piyush Goyal, Nirmala Sitharaman leh Mukhtar Abbas Naqvi-te an ni.

Nirmala Sitharaman-i chu defence minister atan dah a ni a, kum 1982-a prime minister Indira Gandh-i'n defence charge a lak tel hnua hmeichhe zinga defence ministry chang leh hmasa ber a ni. Kum 58 mi, Sitharaman-i hi cabinet top 5, Cabinet Committee on Security (CCS)-ah a tel dawn a, CCS-ah hian Prime Minister, Home Minister, Foreign Minister, Finance Minister leh Defence Minister-te an awm a ni. Piyush Goyal chu Railways minister atan dah a ni bawk a, kum riat chhunga Railway minister pakua-na tur a ni.

Olympic silver medallist Rajyavardhan Rathore chuan Vijay Goel thlakin Sports ministry a chang a, sportsperson zinga Sports ministry enkawl thei hmasa ber a ni ang. Rahote hian 2004 Olympics-ah khan silver medal ala a, Commonwealth Gold medal pahnih, World Championship Gold medal pahnih leh Asian games silver medal pakhat alo la tawh a ni.

Prime Minister Modi chuan minister tharte chu lawmpuina a hlan a, an tawnhriat leh theihnate chu Council of Minister tan a hlu dawn hle tih a sawi a, union cabinet-a hlankaite pawh lawmpuina a hlan nghal bawk. Minister tharte lakluh an nih hnuah PM hi BRICS summit, China-a neih tur hmang turin a zinchhuak nghal a, summit zawhah hian Myanmar a tlawh dawn bawk a ni.