Saashi Tharoor leh Ashok Gehlot-ten Congress President chuh tum

Congress party chuan kum 20 chuang hnuah Gandhi ni lo party president atan a nei dawn niin a lang. October 17-a party president thar thlanna turah hruaitu hlun pahnih, Ashok Gehlot leh Shashi Tharoor-te chuan an chuh dawn nia sawi a ni.

Union minister hlui, Shashi Tharoor hian party hruaitu thar thlan turah chuh a rilruk thu a sawilang hmasa ber a ni. Tharoor hi Congress hruaitu lu, group of 23 member niin, kum 2020 khan Sonia Gandhi hnenah ziakin an party siamṭhat a ṭul thu leh, an party tlakhniamna chhan chu hruaitu ṭhat tawk loh vang niin a sawi.

Medical check-up neia ram pawna zin, Sonia Gandhi chu a rawn haw hnuah Thawhṭanni khan a chenna inah a hmu a, party hruaitu chuh a tumna pawh Gandhi hian a lo remtihpui nia sawi a ni.

Hetih lai hian Gandhi chhungkaw tana rinawm, Rajasthan chief minister Ashok Gehlot pawhin Congress hruaitu dinhmun hi chuh a tum nia sawi a ni bawk. Gehlot hian party hruaitu atan Rahul Gandhi chu a la duh thu leh, inthlan neih turah pawh chuh turin a nawr reng bawk.

Congress MP leh party general secretary-in-charge of communication, Jairam Ramesh chuan, " Tupawh inthlana chuh duh tan chuh theih vek a ni. Inthlan hi langtlang tak leh democracy kalphung ang taka neih a ni dawn a, tumahin inthlana chuh turin midang pawmpuina an neih kher a ngai lo," a ti.

Party president dinhmun hi kum 25 chhung chu Sonia Gandhi leh a fapa, Rahul Gandhi-ten an chelh a ni. Sonia Gandhi hi kum 19 chhung Congress President niin, kum 2017 khan a fapa Rahul Gandhi hnenah he dinhmun hi a hlan. Mahse inthlanpuiah an party an chet chhiat chhoh tak avangin kum 2019 khan Rahul Gandhi hi party hruaitu a nihna aṭangin a bang a, hemi hnu hian Sonia Gandhi hi interim chief atan dah zui leh a ni.

Congress hruaitu zingah Rahul Gandhi hi President-a awm leh tura duhtu tam tak an awm a, inthlan neih turah pawh chuh turin nawr fo mah se, Gandhi hian an ngenna hi a la hnar zel thung.

Party President atana Gandhi chhungkua ni lo awm hnuhnung ber chu Sitaram Kesari niin, kum 1998 March thla khan Sonia Gandhi hian a thlak a ni.

Congress Bharat Jodo Yatra-ah km 225 kal tawh
Congress party-in Bharat Jodo Yatra an huaihawt chu nimin kha a ni 13-na niin, ni 12 chhungin km 225 an kal tawh a ni.

Nimin khan Rahul Gandhi hoin Yatra ni 13-na hi Kerala-a Alappuzha district-a Cherthala aṭangin an kal chhuak a, party worker tam tham tak an tel. Nimin khan km 15 vel kalin, Kuthiyathodu thleng an kal hman.

Bharat Jodo Yatra hi ni 150 chhung neiin, km 3,570-a thui an kal ang. September 7 khan Tamil Nadu-a Kanyakumari aṭangin bul ṭanin, Jammu and Kashmir-ah an tawp dawn a ni.