Bombay HC-in dan loa Union Minister in sak ṭhiat turin hriattir

Bombay High Court chuan Mumbai civic body hnenah, union minister Narayan Rane-a'n dan loa Juhu area-a bungalow a sak chu ṭhiat turin nimin khan a hriattir.

Court chuan Minister Rane-a in sak hian Floor Space Index (FSI) leh Coastal Regulation Zone (CRZ) rules a bawhchhia niin a sawi. Brihanmumbai Municipal Corporation (BMC) hnenah kar hnih chhung ngeiin dan loa in sakte chu ṭhiat tura hriattirin, Rane chu Maharashtra State Legal Services Authority hnenah Rs nuai 10 pe turin a ti bawk.

Rane-a advocate Shardul Singh chuan Supreme Court-a an appeal theihna turin court thupek chu kar ruk chhung 'stay' turin a ngen a, mahse bench chuan a ngenna hi a hnawlsak.

Rane chhungkaw company, Kaalkaa Real Estates-in BMC hnenah dilna an thehluh nawn leh ngaihtuah hun nghak tura a ngenna pawh court chuan a hnawlsak bawk. BMC hian kumin June thla khan company dilna thehluh hi a hnawlsak a, July thla khan dilna hi an thehlut nawn leh a ni.