Farrukhabad-ah Oxygen tlakchham vangin naupang 49 thi

Uttar Pradesh-ah Farukkhabad-a sorkar damdawi-inah thla khat chhungin oxygen tlakchham avangin naupang 49 an thi. Hemi hma lawk hian UP-a Gorakhpur-a Baba Raghav Das (BRD) Medical College-ah oxygen tlakchham avangin naupang 63 an lo thi tawh bawk a ni.

Farukkhabad-a naupang tam tak thihna thlenna hmun hi Ram Monohar Lohia Hospital a ni a, District Magistrate Ravindra Kumar chuan he thil thleng hi chhui chiang turin thupek a tichhuak a, amah pawh hi state sorkar chuan a transfer tawh bawk.

Hospital-a hun reilote chhunga naupang tam tak thihna thleng avang hian Chief Medical officer leh Chief Medical Superintendent te chu an hnaa inthlahdahah puhin an laka FIR thehluh a ni a, an pahnih hian transfer nghal an ni bawk.

Naupang 49 te thihna thlen hun hi July 21 leh August 29 inkar a nia, heng naupangte thi te hi Sick Newborn Care Unit-a awm vek an ni. An thih chhan chhuinaah oxygen tlakchham, ‘Perinatal Asphyxia’ vang a ni tih tih hriat chhuah a ni.

FIR thehluhah hian naupang thi nu leh pate chuan doctor-te’n oxygen tube engmah an dah loh thu an sawi a. Hei bakah hian doctor-te chuan oxygen supply an ngah tawk lo tih chu an hre tur a ni a, oxygen supply tlakchham vanga naupang tam tak thihna thleng hian an hnaah an inthlahdah zia a lang a ni, an tibawk.