Delhi CM Rs 5,000 chawitir

Delhi High Court chuan Chief Minister Arvind Kejriwal-a chu a laka finance minister Arun Jaitley-a’n defamation case a thehluh chungchanga a chhan hun a tihkhawtlai avangin Rs 5,000 chawi turin a ti.

Joint Registrar Pankaj Gupta chuan Kejriwal-a chu October 12-ah a sum chawi tur hi dahlut turin a ti. Arun Jaitley-a hian Kejriwal-a ukil-in a laka ṭawngkam mawi lo tak a hman avang leh, he ṭawngkam hi Kejriwal-a’n hmang tura a tih thu a sawi avangin Kejriwal-a lakah hian defamation case a thehlut a ni.

Hemi hma hian Jaitley chuan Kejriwal leh AAP hruaitu dang panga-te’n Delhi District Cricket Association (DDCA) president a nih laia dik lo taka thil kalpui nia an puh chungchangah kum 2015, December thla khan intihhmingchhiat tuma puhna thubuai hi a lo thehlut tawh bawk. Jaitley chuan a hming an tihchhiat manah cheng vaibelchhe 10 chawi turin a phut a ni.

He thubuai hian Kejriwal-a tan senior laywer Ram Jethmalani chu a ding a, kumin May 17-a thubuai ngaihtuah a nih lai khan Jethmalani hian Jaitley chungchang a sawinaah ‘bumhmang’ tiin a sawi a ni. Jaitley chuan he ṭawngkam hi Kejriwal-a sawi tir a ni em tih a zawhin Jethmalani chuan a nih thu a lo sawi tawh bawk. Hei vang hian Kejriwal-a lakah hian defamation case dang a thehlut leh a, cheng vaibelchhe 10 dang chawi turin a phut leh a ni.