Dera headquarters aṭangin silai 33 man

Haryana-a Sirsa khuaa Dera Sacha Sauda pawl headquarters chu Haryana police-te’n nimin khan an dap a, silai 33 an man.

Police-te chuan silai an mante hi pistol, revolver, .315 bore rifle-te a nih thu an sawi.

Hindu sakhaw pawl pakhat, Dera Sacha Saud hotu Gurmeet Ram Rahim Singh chu amah zuitu hmeichhe pahnih pawngsual thubuaiah thiam loh chantirin, kum 20 tang tura hrem a ni a, Rohtak jail-ah a tang mek a ni. Thiam loh chantir a nih avanga amah zuituten buaina an siamah mi 38 an thi tawh a ni.

Sadar station house officer (SHO) Dinesh Kumar chuan Dera Sacha Sauda hming hian silai licence 67 an neih thu a sawi a, heng zinga 33 hi an man a, a bak 34 chu Dera ho kutah hian a la awm niin a sawi. Dera thuneitute hnenah ralthuamte hi a rang thei anga pe lut tura an ngen thu a sawi bawk.

Rohtak jail-a tang mek, Dera hotu Ram Rahim chu airport-a VVIP list aṭangin paih a ni. He list-a telh mi 51 te chu airport-a reserved lounge an hman phalsak a ni. Mahse Airports Authoirty of India chief Guruprasad Mohapatra chuan pawngsual thubuai-a Ram Rahim thiam loh chantir a nih hnuah VVIP list aṭang paih tur hian aviation ministry hnenah ngenna an siam nghal a ni.