MP-ah Blue whale game vangin intihlum awm leh

Online game hlauhawm tak, Blue Whalte game khelh avangin Mahdya Pradesh-ah Class XI zirlai, Satvik Pandey chu kar kalta Inrinni zan khan a intihlum.

Satvik Pandey hi rel tlan lai hmaah zuang lutin a intihlum a ni. School-a a ṭhiante chuan Pandey hian Blue Whale game hi a khelh ṭhin thu leh, midangte pawh khel ve tura a sawm ṭhin thu an sawi.

Blue whale game hi online game hlauhawm tak a ni a, game kheltute chu tihtur 50 tuksak an ni a, tihtur tuksakte chu thil hlauhawm tak tak, mahni intihnat theihna thilte a ni. Tihtur tukte chu an hlen­chhuak a ni tih lanna thlalakte pholan a ngai bawk. A tihtur tuk tawp ber, a vawi 50-naah hian mahni intihlum turin a ti ṭhin a ni. He game vang hian ram hrang hrangah pawh intihlum an awm nual tawh a ni.

Madras High Court chuan he game hlauhawm leh ṭhat loh zia hi sawiin, central leh Tamil Nadu sorkar hnenah khap a nih theih dan ngaihtuah turin a ti. Justice KK Sasidharan leh GR Swaminathan awmna Madurai bench chuan Union Information and Broadcasting Secretary leh state Home Secretary bakah IT department-te hnenah rawtna hrang hrang an thehlut a ni.