Senior journalist Gauri Lankesh-i kaphlum

Senior journalist Gauri Lankesh-i chu Thawhlehni zan khan Bengaluru-a a chenna-in bulah kahhlum a ni.

Police-te chuan Lankesh-i hi hnai taka kah a nih thu an sawi a, a kaphlumtu hian vawi sarih silai hmetpuakin silai mu pali chuan a ṭhelh a, a awmah silai mu pahnihin fuhin, a chalah pakhatin a fuh bawk. A chenna-in gate bulah Gauri hi a thi a ni.

Kum 55 mi, Gauri Lankesh-i hian kartin chhuak, Kannada tabloid - Gauri Lankesh Patrike a enkawl a, Thawhlehni zan dar 7.30 vela Basavanagudi-a a office a chhuahsan chu car pakhatin a zui nia sawi a ni. CCTV-a a lan danin, a in main gate a pan lai chu mi pakhat, helmet khum, jacket dum hain a lo nghak a, hnai takaha a lo kap a ni.

Police-te chuan rinhlelh thilah Chikmaglur-a mi pakhat, twitter-a Gauri Lankesh-i a huat thu ziaktu chu an man a, ani bakah hian Manju Mallyarjun leh Sandeep tihte chu thu an zawtfiah bawk. Thil awmdan chhui chiang turin Chikmagalur leh Mangaluru-ahte police team tirh an ni. Police te chuan he tualthahna thleng­ah hian mi pakhat chauh hi a inhnamhnawih an ring.

Karnataka Chief Minister Siddaramaiah chuan tualthahna thleng chu a dem thu a sawi a, “Journalist ṭha tak Gauri Lankesh-i rawng taka thah a ni hian min ṭhawng hle a, hetianga pawikhawihna tenawm tak thleng hi ka dem takzet a ni”, a ti. State sorkar chuan Lankesh-i thih dan chhui tur hian Special Investigaton Team a din nghal a, BJP chuan CBI chhuitir an phut.

Union Home Minister Rajnath Singh chuan Home Secretary Rajiv Gauba hnenah Lankesh-i thih dan chungchangah Karnataka sorkar report la turin a hriat­tir a, state sorkar chu thil thlen dan kimchang leh, tual­thattu man tura a hma lak dan thehlut turin a ti bawk.

Left thinker nghet tak, Hindutva politics sawisel ṭhintu, Gauri Lankesh-i hi nikum khan Bharatiya Janata Party (BJP) MLA Pralhad Joshi-a’n intihmingchhiat tuma puh a, a laka thubuai a thehluhah thiam loh chantir a lo ni tawh a ni.

Lankesh-i thah a nih hnu hian Congress vice president Rahul Gandhi chuan BJP chu na takin a bei nghal a, RSS leh BJP sawiseltute chu beih let leh thah an ni fo tih a sawi. Hei hi Union minister Nitin Gadkari chuan chhangin, Congress hruaitu thusawi hi thu belh­chian dawl lo a nih thu leh, Gauri Lankesh-i thihnaah chuan BJP leh a zawmpui pawlten inhnamhnawihna an neih loh thu a sawi.