Bawng humhalhtute chetdan dang turin sorkar laipui hriattir

Supreme Court chuan sorkar laipui leh state sorkar chu, bawng humhalh chhuanlamah hmanga pawikhawihna thlen ṭhinte dang tura hma la thuai turin a hriattir.

Supreme Court chuan state tin hnenah an state chhunga district tinah bawng humhalh chhuanlama pawikhawihna thlentute laka action la turin nodal officer ruat vek turin a hriattir. Hemi rual hian heng pawikhawihna thleng ṭhin dang tur hian sorkar chuan eng angin nge hma a lak a zawt nghal bawk.

Chief Jutice of India Dipak Misra kaihhruai bench chuan state tinte chu hetianga pawikhawihna thlen ṭhinte dan leh ven hna thawktu tur, senior police officer, Deputy Superintendent of Police rank chin nominate turin a ti a, bawng humhalhtu pawl intiten an mahni thua dan an lo lekkawh leh, dan siamtu ni ang maia an che ṭhin chu dan an ngai a ni, a ti. State sorkar te chu an nomination thehlut tur hian kar khat hun a pe bawk.

Journalist Tusharw Gandhi-a’n bawng humhalhtu intiten bawng humhalh chhuanlama pawikhawihna an thlen fo chungchangah Supreme Court-ah PIL a thehlut a, thupek hi tihchhuah a ni zui ta a ni. PIL thehluttu aiawha ding, senior advocate Indira Jasing chuan sorkar laipuiin bawng talh khapna a siam hnuah bawng humhalhtu intite hian ṭum 66 pawikhawihna an thlen tawh niin a sawi.