India leh Egypt-in defence lama thawhdunna tur MoU ziak

India leh Egypt chuan defence lama thawhdunna tur, Memorandum of Understanding (MoU) an ziak a, inremna an siamah hian Egypt rama cham mek, defence minister Rajnath Singh leh Egypt defence minister general Mohamed Zaki-ten an hming an ziak a ni.

Ministry of Defence (MoD) chuan Egypt tlawha Rajnath Singh zin chu ram pahnihte tana pawimawh tak a ni tih sawiin, defence lama sector hrang hrangah thawhdunna ṭha leh zau zawk siamna tur kawng a hawng a ni, a ti.

Thawhṭanni khan Rajnath Singh leh general Mohamed Zaki-te hi Cairo-ah an inkawm a, thawhdunna nghet leh zau zawk neih dan turte an sawidun bakah, joint exercise-te neih a, counter-insurgency lama training nei tura sipaite tirhtawn dan turte an sawi bawk.

Rajnath Singh hian October 18-22-a Gandhinagar, Gujarat-a 12th DefExpo neih ruala India-Africa Defence Dialogue leh Indian Ocean Region (IOR) Defence Ministers’ conclave neih tura tel turin Egypt defence minister hi a sawm nghal bawk.