SC constitution bench hearing live-in en theih dawn

Supreme Court-a constitution bench zawng zawngte hearing neih lai chu karleh Thawhlehni, September 27 aṭangin live-a tihchhuah a ni tawh dawn.

Supreme Court-a judge zawng zawngte chuan Thawhlehni khan hearing neih lai, live-streaming neih a nih dan turte an sawiho a, September 27 aṭanga kalpui ṭan hi an remti a ni.

Senior advocate Indira Jaising chuan kar liam ta khan Chief Justice of India leh Supreme Court judge dangte hnenah mipuite kaihhnawih thil leh, ram tana thil pawimawh chungchanga court hearing neih chu mipuiten an lo thlir ve theihna tura live-a pechhuak ṭan tawh turin a ngen. Jaising chuan EWS quota, hijab khapna, leh Citizenship Amendment Act (CAA) chungchanga petition thehluh, Supreme Court-in a ngaihtuah lai chu ram pum tana thil pawimawh a ni a, thu dik tawk lo thehdarh a tam ṭhin avangin, heng thu an ngaihtuah lai chu live-a tihchhuah a ngai a ni, a ti.

Jaising chuan Supreme Court chuan ama puala channel nei tur leh, hearing an neih lai chu an website bakah YouTube-ah pawh an pek theih thu a sawi bawk.

Gujarat, Orissa, Karnataka, Jharkhand, Patna leh Madhya Pradesh High Court-te chuan an YouTube channel-ah hearing neih lai hi live-in an pechhuak ṭhin tawh a ni.