PM CARES Fund trustees atan mi 3 ruat belh

Sorkar laipui chuan PM CARES Fund trustees atan mi pathum - veteran industrialist Ratan Tata, Supreme Court judge hlui KT Thomas leh Lok Sabha deputy speaker hlui Kariya Munda-te a ruat belh.

Prime minister Narendra Modi kaihhruaiin Thawhlehni khan PM CARES Fund Board of Trustees meeting hi neih a ni a, union home minister Amit Shah leh union finance minister Nirmala Sitharaman-te an tel. Shah leh Sitharaman-te hi PM CARES Fund-ah hian Trustees an ni. Meeting-a hian trustees atan mi pathum hi an ruat belh a ni.

Prime Minister Office-in a tarlan danin, Trust hian Advisory Board din a rel bawk a, member atan Comptroller and Auditor General of India hlui Rajiv Mehrishi, Infosys Foundation chairperson hlui Sudha Murthy leh Teach of India co-founder Anand Shah-te an ruat bawk.

PM CARES Fund hi kum 2020 khan India rama Covid-19 hri leng vanga siam niin, mimal leh pawl-ten he fund tana sum an pekte chu hri leng vanga harsatna tawkte ṭanpuina leh, chhawmdawlna pekna atana tih a ni. Prime Minister chu PM CARES Fund-a hian ex-officio Chairman a ni.

Thawhlenia meeting-ah hian PM CARES Fund hmanga hmalakna hrang hrangte tarlan a ni a, heng zingah hian naupang 4,345 chhawmdawl hna thawk mektu, PM CARES for Children Scheme te pawh sawilan a ni. PM Modi chuan PM CARES Fund tana sum petu zawng zawngte chungah lawmthu a sawi bawk.