1993-a Mumbai-a bomb tipuaktute thi tura hremna pe
Mumbai-a special Terrorist and Disruptive Activities (Prevention) Act (TADA) court chuan nimin khan kum 1993-a Mumbai khawpuia ṭum eng emaw zat bomb tipuaktua puh, Tahir Merchant leh Feroz Khan-te chu thi turin an chungthu a relsak.
TADA court hian firfiak paruk - Abu Salem, Mustafa Dossa, Firoz Khan, Mohammed Tahir Merchant alias Tahir Taklya, Karimullah Khan leh Riyaz Ahmed Siddique-te chu Mumbai khawpui beihna kaihhnawihah hian thiam loh a lo chantir tawh a ni. Merchant leh Khan te chu thi tura hremna pek an ni a, Abu Salem leh Karimullah Khan te chu damchhung tang tur leh cheng nuai hnih chawi tura tih an ni a, Riyaz Ahmed Siddique chu kum 10 tang tura hrem a ni bawk. Dossa hi thiam loh chantir a nih hnuah a thi a, hei vang hian a thubuai hi tihtawp a ni.
TADA court hnuaiah hian damchhung tang tura tihte hi an thih hma zawng a ni a, mahse extradition dan hnuaiah damchhung tang tura tihte tan hun hi kum 25 chin a ni. Salem leh Khan te hian kum 25 jail an tan hnuah sorkar laipui chuan chhuah tur nge tan chhunzawm tir zel tur tih a la ngaihtuah leh ang.
Kum 1993 khan Mumbai khawpuiah hian ṭum 12 zet bomb tihpuah a ni a, bomb puak avang hian mi 257 thiin, mi 700 chuangin hliam an tuar a ni.