UP-ah rel chesual leh

Uttar Pradesh-a Sonbhadra district-ah nimin khan Jabalpur pana tlan, Shaktikunj Express rel chu chesualin pindan pasarih a let.

Railway ministry thupuangtu Anil Saxena chuan rel chetsual hun hi zing lam dar 6.25 vel a nih thu a sawi a, a chetsual lai hian rel hi darkar khata km 40 vela chakin a tlan a, a tlan chak loh lai a nih avangin chhiatna pawh a thleng nasa lo niin a sawi.

Rel-a chuang zingah hliam an awm lo a, khaulzinte chu hruaichhuah niin rel pindan let te pawh hnuhsawn nghal an ni.

Nimina rel chetsualna thleng hi thla khat pawh tling lo chhunga Uttar Pradesh-a rel chetsualna a thlen ṭum thumna a ni. August 19 khan Muzaffarnagar district-ah Utkal Express chesualin mi 22 an thi a, mi 156-in hliam an tuar. August 23 khan Auraiya district-a Kaifiyat Express rel pindan 10 letin khualzin 100 velin hliam an lo tuar tawh bawk a ni.

Nimin chhun dar 11.45 khan Delhi-a Minto Bridge railway station bulah Ranchi-New Delhi Rajdhani rel a chesual bawk a, northern railway thupuangtu chuan engine leh power van te an let a, mahse hliam tuar an awm lo niin a sawi.