CBI-in Lalu leh a fapa Tejashwi thu zawhfiah turin ko

Central Bureau of Investigation (CBI) chuan Rashtriya Janata Dal (RJD) party hotu Lalu Prasad Yadav leh a fapa Tejashwi-te chu Lalu-a, union railway minister a nih laia private company hnenah IRCTC contract pek a nih danah thu zawhfiah turin a ko.

CBI chuan Lalu-a hi September 11-ah agency hmaa inlan turin a ko a, a fapa Tejashwi chu September 12-a inlan turin a ko bawk. Lalu-a te pafa hi railway contract hmutu, private company nen an inzawmna neih dante an zawtchiang dawn niin a sawi.

CBI hian Lalu-a railway minister a nih laia railway hotel pahnih, BNR Ranchi leh Puri enkawlna tur contract chu private company - Vinay leh Vijay Kochhar-te company, Sujata Hotel Private Limited hnena pe tura a hriattirna lehkha pawh an nei tawh niin a sawi. Sujata Hotels hnena contract pek a nih avangin anni hian Patna khawtlang lama ram zau tak chu RJD hruaitu ṭhian ṭha, Delight Marketing hnenah man tlawm takin a lei tir a, he ram hi a hnuah Lalu-a te chhungkaw company, Lara Projects hnenah hlan a ni. CBI chuan Delight Marketing hlut zawng hi cheng vaibelchhe 32.5 a nih laiin, Lalu chhungkaw hnenah hian cheng nuai 64-a hralh a nih thu a sawi.

Lalu leh a chhungte, a nupui Rabri Devi, a fapa Bihar deputy chief minister hlui Tejashwi-te lakah hian eiruk thubuai ziahluh a lo ni tawh a, thubuai ziahluh a nih hnu hian CBI chuan Lalu te chhungkaw hmun pawimawh 12 chu an lo dap tawh bawk. Lalu chuan an puhnate hi thu dik lo a nih thu sawiin, BJP chu a duh dan anga CBI hmang kualah a puh let thung.