Congress MLA-te'n RJD nena inzawmna tihtawp duh

Bihar-a Congress MLA 27 zinga 19-te chuan an party vice president Rahul Gandhi hnenah Rashtriya Janata Dal (RJD) nena inzawmna tihtawp turin an ngen.

MLA-te hian tunhnaia meeting an neihah an thil phut hi sawiin, RJD hotu Lalu Prasad Yadav chu Congress lakah a rinawm ngai lo niin an sawi. RJD hotu chu upper caste-te sawisel ṭhin le, Mulsim-Yadav constituency chu a party tana hauh tlatah an puh a, hei vang hian kum sawmhnih chhung chu Bihar-ah Congress party a chet ṭha theih loh phah niin an sawi bawk.

Bhagalpur Congress MLA Ajit Sharma chuan Rahul Gandhi hnenah hian Congress chuan tunah rih chuan Bihar-ah RJD thawhpui hi a mamawh rih lo niin a hrilh a, an thawhdun a ṭul hunah chuan an thawhpui leh mai dawn niin a sawi. Tuna RJD an thawhpui mek chuan state chhunga an party dinhmun a tichhe zawk niin a hrilh.

RJD chu seat insem chung-changah pawh Congress duhsakna nei loah an puh a, Congress party-in hnehna an chan theih lohna tur seat pe ṭhinah an puh a ni. Hei bakah hian RJD hian anti-BJP rally a huaihawtah pawh an rally tihlarna atan, Lalu chuan Sonia leh Rahul Gandhi-te hming a lam ri reng chungin, poster-ah an thlalak pawh a dah duh lo a ni, an ti. Congress chu national party a ni a, RJD duhdan anga awm tur a ni lo tih an sawi bawk.

Bihar-ah hian JD(U), Congress leh RJD-te chu Grand Alliance tih hmingin an thawkho a, ṭangrual sorkar an siam a ni. Mahse JD(U) president leh Bihar Chief Minister Nitish Kumar chuan July 26 khan an thawhhona hi titawpin, BJP nen thawkdunin sorkar thar an siam zui a ni.