Sorkarin 'no fly list' rules a tichhuak

Sorkar laipui chuan thlawhtheihnaa khualzin che mawi lo te chuan khapna tur, 'no fly list' rules a tichhuak.

Civil aviation ministry chuan thlawhtheihna chuan khap theihte hi chi thumah a ṭhen a, chungte chu ṭawngkam mawi lo hman, kut thawh leh midang nunna atana hlauhthawnawm zawnga che titein a thliar a ni.

Khualzin zinga ṭawng­­kam mawilo tak hmangtute chu thla thum chhung thlawhtheihnaa an chuan khap a ni thei dawn a, a kut thawh zawnga che chu thla ruk thleng hrem theih niin, midang nunna atana hlauhthawnawm khawpa che chu kum hnih aṭanga an damchhung thlawhtheihnaa an chuan khapsak theih an ni ang.

Khualzin che mawi lote hremna tur hi an chuanna airline-a member pathum awmna committee-in a ngaihtuah ṭhin ang a, ni 30 chhungin thutlukna hi siam ṭhin a ni ang. Committee-in a ngaihtuah chhung hian airline-te chuan khual­zin che mawi lo lakah hian flying ban hi an lo hmang nghal thei ang.

Directorate General of Civil Aviation hnenah airlines hrang hrangte chuan no fly list-a an telhte chu an pe ṭhin dawn a ni. Kumin kumtir lam khan Shiv Sena MP Ravindra Gaikwad chu Air India official kut a thlak avangin ramchhunga airline zawng zawngte chuan an thlawhtheihnaa a chuan an khap a, mahse Gaikwad hian ngaihdam dilna a thehluh hnuah he hremna hi an hlip leh ta a ni.