In ramah bawngsa chu ei mai rawh u : Tourism minister

Tourism Minister thar KJ Alphones chuan Ningani khan bawngsa ei chungchangah sawizui hlawh tak tur thu a sawichhuak.

Minister hian Bhubaneswar-a Indian Association of Tour Operatos convention a hmanpui a, convention kar laka chanchinthar lakhawmtuten an kawmnaah, India rama khualzin rawn kal turte chuan bawngsa an ei duh a nih pawhin India an rawn pan hmain an ramah ei mai sela, chumi hnuah India-ah chuan rawn kal mai rawh se, a ti.

Tourism minister atana lakluh a nih hnu lawk khan KJ Alphons hian bawngsa khap chungchang chu BJP thil tum a nih loh thu a lo sawi tawh a, "BJP hian state tinte ei tur a bituk sak lo. Goa Chief Minister pawhin Goa chu bawngsa eina state a ni a, an ei chhunzawm zel dawn tih a sawi a, Kerala-ah pawh bawngsa an ei a, an la ei zel dawn bawk a ni. Hemi chungchangah hian BJP chuan harsatna a nei lo a ni", tiin a lo sawi tawh a, mahse a thusawi hmasa kalh zawngin thu a sawi leh ta a ni.