Blue Whale enkawltute hrilh thei hnenah lawmman phal

Gujarat sorkar chuan tun­hnaia online game hlauhawm tak leh lar chho mek, Blue Whale Challen­ge enkawltute chanchin hrilh thei hnenah lawmman, cheng nuai khat pek a tiam.

Gujarat sorkar chuan mi eng emaw zatin mahni an intihlum phahna, Blue Whate game hi alo khap tawh a, state home department chuan police department leh district administration-te hnenah he game khelh hi khap turin alo hriattir tawh a ni.

Minister of State for Home, Pradipsinh Jadeja chuan state police cyber cell chuan he online game chungchanga hriat duh neite tan helpline number a siam tawh bawk a ni. Jadeja chuan CrPC leh Gujarat Police Act hnuaiah he game khelh hi khap turin state sorkar chuan a hriattir a ni, a ti.

Blue Whale game khelh avang intihlum tam zawk hi tleirawl leh rawlthar te an nih avangin, zirna-in hrang hrangah pawh he game hlauhawmzia zirtirin hma an la a, nu leh pate pawh an faten eng game nge an khelh tihte an hriatthiam theih nana police-te an biak theihna number-te pawh siam a nih thu Jadeja chuan a sawi. Blue Whale game enkawltute chungchang hrilh theih hnenah lawmman cheng nuai khat phal a ni a, chanchin hrilhtu hming hi thup a nih tur thu a sawi bawk.

Blue whale game avang hian Ningani khan Lucknow-a Class VIII zirlai pakhat chu a intihlum leh. Kum 14 mi, Aditya Vardhan hi Indira Nagar-a an inah a inawkhlum hmuh a ni a, a mobile phone-ah Blue Whale games hi a lo khel ṭhin nia sawi a ni.