Blue Whale : Lucknow school-ah smartphone khap
Uttar Pradesh khawpui, Lucknow-ah chuan naupangten tunlaia online games hlauhawm tak, mi tam tak intihhlum phahna, Blue Whale Challenge laka naupangte himna tur kawng khat atan school hrang hrangah smartphone hman khap a ni.
Zirlai naupang nu leh pa, leh an mahni enkawltute chuan an fa/nauten he games hi an khel nge khel lo enfiah tura ngen an ni. Blue Whale games avang hian tleirawl/rawlthar eng emaw zat an intihlum tawh a, kar hmasa khan Indira Nagar-ah rawlthar kum 14 chu Blue Whale game a khelh avangin a room-ah in awkhluma hmuh a ni.
District Inspector of Schools, Mukesh Kuamr Singh chuan school-a naupangten smartphone an hman khap a ni a, zirlai nu leh pa leh zirtirturte chu naupangte awmdan thlithlai fo tura hriattir an ni bawk, a ti. School thuneitute hnenah pawh an zirlai naupang, nunphung danglam deuha awm nia an hriatte chu ngaihven vat a, kawmchiang ṭhin tura ngen ani bawk tih a sawi.
Uttar Pradesh Police-te chuan kar hmasa khan state chhung district hrang hranga police hotute chu Blue Whale game khap tur hian alo hriattir tawh a ni.