Modi leh Japan PM-te’n bullet train project lungphum phum dawn

Prime Minister Narendra Modi leh Japan Prime Minister Shinzo Abe-te chuan September 14 hian Gujarat-ah, Ahmedabad-Mumbai High Speed Rail Network lungphum an phum dawn.

High-Speed train, bullet train tia hriat lar hi mi 750 chuan theihna tur a ni a, Ahmedabad leh Mumbai khawpui inkar tlanna atana hun hman ṭhin, darkar sarih chu darkar thumah a tla­hniam dawn a ni. He project atan hian cheng vaibelchhe nuai 1.10 vel sen a ni dawn a, Japan hian a senso hi a tumpui dawn a ni.

Ahmedabad-Mumbai High Speed Rail Network hi kum 2023 December thlaa zawh hman tura ruahman a ni a, mahse official-te chuan target aia zo hma tur hian sorkar chuan ruahmanna a siam dawn niin an sawi.

Rel hi khawpui pahnih inkarah hian station 12-ah a chawl ṭhin dawn a, mahse second 165 chhung chauh zel a chawl ang. Boisar leh Bandra Kurla Complex inkarah km 12-a thui lei verh a ni dawn bawk a, heng zinga km 7 chu tui hnuaiah siam a ni ang.

Project lungphum an phum zawh hnuah, investment summit neih zui a ni ang a, he hunah hian Japan aṭangin Japan External Trade Organisation (JETRO) leh Japan International Cooperation Agency (JICA) aiawhte an tel dawn a ni.