CBI-in Congress minister hlui lakah FIR thehlut

Central Bureau of Investigation (CBI) chuan kar kalta Inrinni khan Enviroment Minister hlui, Congress hruaitu ni bawk Jayanthi Natarajan-i chu minister a nih laia dan kalha thil tia puh a nih chungchangah, a lakah FIR a ziak lut a, Chennai-a a chenna in an dap bawk.

CBI-in FIR a thehluh­ah hian, UPA sorkar laia minister of state, Natarajan-i hian minister a nih lai hian dan kalhin thil lai­chhuah hna kalpuina turin forest ram hman theihna tur clearance a pe nia sawi a ni. Hei vang hian Indian Penal Code Section 120B (criminal conspiracy) leh Prevention of Corruption Act hnuaiah thubuai siamsak a ni. CBI chuan Electrosteel Casting Limi­ted leh he company-a managing director hlui Umang Kerjiwal te chu thubuai a siamsak bawk.

Kum 2012 khan Natarajan-i hian Forest (Conservation Act) palzutin, mining company Electrosteel hnenah hian Jharkhand-a Singhbhum distric-a Saranda Forest hnuaia forest ram hman theihna turin phalna a pe a ni. Company dilna hi Natarajan-i hmaa minister hna chelhtu, Jairam Ramesh-a chuan a hnawlsak a, mahse Natarajan-i hian phalna hi a pe nia sawi a ni.