Eng thil pawh hmachhawn turin Indian force inpeih : Defence Minister

Defence Minister Nirmala Sitharaman-i chuan India sipaite chu eng dinhmun pawh hmachhawn turin an inpeih a ni, a ti.

Minister hian Pathianni khan Rajasthan-a Bawrmet district-a Uttarlai airbase a tlawh a, a thil dah pawimawh ber tur chu eng thil pawh hmachhawn tura armed force-te inpeih tir reng a nih thu a sawi. Hetih lai hian China leh Pakistan sipaiten India an ep chungchang erawh a sawilang duh lo a, khawmual sipai hotu General Bipin Rawat-a’n tunhnaiah India chu hmun hniha indona hmachhawn tura a inbuatsaih a ngai nia a sawi chungchang pawh a sawizui duh lo.

Sitharaman-i chuan China leh Pakistan chu tunge chak zawk ang tih lam ngaihtuah loin, kan ram himna tiderthawng thei thilte lo do let tura kan inbuatsaih a ngai a ni. Defence force-te hi an inpeih reng a ngai a ni, a ti.

CAG report-in defence force-te silaimu neih zat chu indo thleng thut pawh ni se ni 20 bak a daih dawn lo nia a tarlan pawh a pawm lo a, silaimu indaih lohna a awm lo tih a sawi. Sipai te hman tur silaimu leh hmanraw dangte chu lei hunbi a awm ṭhin a ni, tiin a sawi.

Force-te mamawh tihpuitlin chu a hna hmasa leh ngaih pawimawh a nih thu a sawi a, Defence minister charge a lak hnuah Prime Minister leh NSA pawh hmu nghalin, India sipaite inbuatsaih dante a sawipui nghal niin a sawi. Force lamin harsatna a neihte chu ngaihtuah vat an nih tur thu a sawi bawk.