Gurgaon School official-te man

Kar kalta Zirtawpni khan Gurgaon-a Ryan International School-a toilet-ah Class 2 zirlai, mipa naupang kum sarih mi thah a ni a, tualthattua puh school bus conductor chu man a ni tawh.

School building chhunga tualthahna thleng avang hian school official pahnih, School Legal Head, Francis Thomas leh HR Head, Jeyus Thomas te chu man an ni tawh a, school hi khar lailawk a ni bawk.

Zirlai nu leh pa leh tualchhung mite chuan school chhunga inthahna thleng duh lohna an lantir a, school bula zu dawrte an hal a, police-te chuan pungkhawmte hi tiang nen an hnawtdarh a ni. Hetih lai hian lungawi lohna lantira pungkhawmte thla lo la tu, journalist pakhat chu police officer-in kut a thlak a, kutthlaktu police officer hi suspend nghal a ni.

School bus conductor, Ashok chuan zirlai naupang hi khuaikhem a tum a, mahse a lo hnial avangin a that niin a sawi. Mipa naupang nu leh pate chuan he thil thleng hi CBI chhuitir an phut a, Supreme Court-ah petition pawh an thehlut tawh bawk. Haryana police-te chuan he tualthahna thleng chhui tur hian team a din a ni.

Member pathum awmna, Special Investigation Team chuan school chhunga CCTV camera dah tam zawk chu a ṭha lo niin an sawi a, hei bakah hian school chhungah school bus driver-te tan toilet hran siam a ni lo a, zirlaite toilet hman chu an ṭawm ve mai niin an sawi bawk. School-in thawktu atana a chhawrte chu an background chhui lo leh, police verfication nei loin a chhawr niin an sawi bawk.