Sirsa-a Dera hospital chhui chiang dawn

Sirsa, Haryana-a Dera Sacha Sauda headquarters-a an hospital-ah chuan dan loin nau tihtlak sak an ni ṭhin nia sawi a nih vangin Haryana sorkar chuan a chhui chiang dawn.

Hindu sakhaw pawl pakhat, Dera Sacha Sauda hotu Gurpreet Ram Rahim Singh chu amah zuitu hmeichhe pahnih pawngsuala puhin thiam loh chantir a ni a, kum 20 tang tura hrem niin Rohtak jail-ah a tang mek a ni.

Ram Rahim-a man a nih hnu hian Punjab and Haryana High Court chuan Dera headquarters thenfai hna thawk tur hian thupek a tichhuak a ni. Sirsa-a Dera headquarters hi a changtlung hle a, an headquarters chhungah hian educational institute, cinema hall, stadium, seven-star hotel, shopping complex leh residential building eng emaw zat, luxury bungalow leh hospital te a awm a ni.

Pathianni khan headquarters enfiah hna hi thawh zawh a ni.

Der hospital, Shah Satnam Ji Super Speciality Hospital record an enfiah aṭangin he damdawi-inah hian medical termination of pregnancy (MTP) act zawm loin dan loa nau tihtlak sak an ni ṭhin niin deputy commissioner Prabhjot Sigh chuan a sawi.