India-ah Covid-19 kai nuai 12 chuang tawh

Ministry of Health and Family Welfare-in nimina report an tihchhuahah darkar24 chhungin India ramah Covid-19 kai hmuh chhuah thar 45,720 an awm a, hei hi ni khata hmuh chhuah tam ber record ni lehin; ramchhung hmun hrang hrangah Covid-19 kai mi 12,38,635 an awm tawh.

MoHFW chuan darkar 24 chhungin dama puan mi 29,557 an awm tih tarlang bawkin, hri kai tawh zinga mi 7,82,607 lai chu enkawl dam an ni tawh. Nimina an report tihchhuaha enkawl dam hi hri len ṭantirh aṭanga darkar 24 chhunga enkawl tam ber ṭum a ni. Enkawl dam rate hi 63.18% a ni a, hri kai mek mi 4,26,167 an la awm bawk. Nimina report an tihchhuahah hian thihpui 1,129 lai an awm leh a, nikhata sang chuang an thih hi a khat viau a, niminah hian thihpui an tam hle. Covid-19 vang hian India ram hmun hrang hrangah mi 29,861 an thi tawh a, thihpui rate hi 2.41% a ni.

Indian Council of Medical Research (ICMR) chuan darkar 24 chhungin sample 3,50,823  an enfiah tih tarlangin nimin thleng khan ramchhung hmun hrang hrang laboratory aṭangin sample 1,50,75,369 an test tawh. ICMR hian laboratory pawmpui 1,284 an nei tawh a, heng zinga 895 hi sorkar laboratory a nih laiin 389 chu private laboratory a ni thung. India ram khawpui Delhi chu recovery rate sanna ber niin 85.21% a ni tawh a, Ladakh, Haryana, Telangana leh Andaman and Nicobar Islands-ahte chuan recovery rate 73% aiin a sang bawk a ni. State leh UT 19-ah chuan national average aiin recovery rate a sang zawk a, State leh UT 30-ah national average aiin thihpui rate a hniam zawk bawk. Rampuma hri kai zawng zawng aṭanga 67.74% lai hi Maharashtra, Tamil Nadu, Karnataka, Andhra Pradesh leh Uttar Pradesh-a case awmte an ni bawk.