Punjab-a rorellai, Aam Aadmi Party (AAP) MLA-te chuan Punjab Vidhan Sabha special session phalsak an nih loh avangin nimin khan lungawi lohna an lantir. 
AAP MLA-te hian eptu pawl, Congress leh BJP chu state assembly special session neih tum dodal leh inthurualah puhin, an demna thu ziakte an keng bawk. Governor chenna in pana kawng an zawh police-te an lo dang a, mahse AAP MLA-te an lo danna hmunah hian sit-in protest an huaihawt zui a ni. 
Chief minister Bhagwant Mann kaihhruai AAP sorkarin confidence motion put luhna tura special assembly session neih a tum chu Nilaini khan Governor Banwarila Purohti chuan a sut a ni. Governor chuan Congress leh BJP lamin special session neih chu House danin a remti lo nia an hrilh hnuah, mithiamte a ráwn a, hemi hnu hian nimina special session neih tum ṭhulhna order chu a tichhuak a ni. 
AAP national covener Arvind Kejriwal leh Punjab CM Bhagwant Mann chuan assembly session neih a remtih loh avangin Governor an dem thu sawiin, India democracy dinhmun chu a ngaihtuahawm hle niin an sawi. Hetih lai hian eptu party-te chuan sorkarin a duh dan anga thil kalpui a, ram danpui palzut a tumna a dan avangin Governor chu an fak ve thung. 
Punjab-a AAP sorkar chuan an sorkar paihthlak tuma hma laah BJP a puh a, hei vang hian sorkar chuan thlawptu a ngah tawk tih fiahna atan special session neih a, confidence motion putluh a tum a ni. AAP chuan BJP-in party dang sorkarna tihchhia an tumna, Operation Lotus a kalpuina hnuaiah, Punjab-a AAP MLA 10 vel chu biain, Rs vbc 25 vel ṭheuhin thlem chhuah a tum niin an puh a ni. 
CM Mann chuan Governor-in Assembly special session neih tur a sut leh hnuah, September 27-ah state Assembly sesion neih a ni dawn tih nimin khan a sawi zui nghal a ni. CM chuan cabinet meeting-in lungrual takin an rel a ni tiin, Governor-in special session neih tur a sut leh chungchang chu Supreme Court-ah thlen a tum thu a sawi bawk.