Congress President thlanna tur atana hriattirna tichhuak

Congress central election authority chuan All India Congress Committee (AICC) president thlanna neih tur atana hriattirna chu nimin khan a tichhuak.

Central election authority chairman, Madhusudan Mistry chuan hriattirna hi tichhuakin, inthlan hi October 17-ah neih a ni ang. Party president chuh tumte tan September 24 - 30 chhungin nomination paper a thehluh theih a, October 1-ah endik a ni ang. Inhnukdawk duhtan October 9 thleng hun hawn a ni bawk.

President chuhtu hi pakhat aia tam an awm a nih chuan October 17-ah inthlan a ni ang a, October 19-ah vote chhiarin result puan nghal a ni ang.

Party president chuh tumte hi sawichian la ni lo mah se, hruaitu hlun leh union minister hlui Shashi Tharoor leh Rajasthan chief minister Ashok Gehlot-te chuan chuh an tum nia sawi a ni.

Congress president thlan thar tur hian an party president dinhmun chelh rei ber, Sonia Gandhi a thlak dawn a ni. Party President thlanna an neih hnuhnung ber chu kum 2000, November thla kha a ni tawh a ni.