SC-in Rajasthan speaker petition thehluh ngaihtuah

Supreme Court chaun nimin khan Rajasthan Assembly Speaker CJ Joshi-a'n Rajasthan High Court order siam chungchanga petition a thehluh chu a ngaihtuah a, mahse HC order stay tura a ngenna erawh a pawm sak lo. 

Rajasthan High Court hian sorkar laka hel, Sachin Pilot leh Congress MLA dang 18-te hnenah Speaker-in disqualification notice a pek chungchang, Pilot-a'n a khin letna chu a ngaihtuah a, Speaker hi Zirtawpni hma chu MLA hel lakah action la lo turin a hriattir a ni. High Court-in thupek a pek chungchangah hian Speaker chu Supreme Court-ah a zualko ve leh a ni. 

Mahse judge pathum - Justice Arun Mishra, Justice Krishna Murari leh Justice B R Gavai awmna SC bench  chuan Speaker-in a ngenna anga HC thupek tihchhuah tawh dansak a phutna chu a pawm sak lo a, kar leh Thawhṭannia hearing neih chhunzawm turin a dah leh ta zawk a ni. 

Speaker Joshi hian chief minister Ashok Gehlot laka hel, Sachin Pilot leh Congress MLA 18-te chu Congress MLA meeting ṭum hnihah an tel duh loh avangin party duh dan kalha awma puhin ban an nihna tur hriattirna a pe a ni. Hetih lai hian MLA helte hian Congress chhuahsan an tum lo a, hruaitu thlak an phut mai niin an sawi thung.