SC-in Madhya Pradesh CM hriattirna pe

Supreme Court (SC) chuan Nilaini khan Madhya Pradesh chief minister Shivraj Singh Chouhan hnenah, a kaihhruai BJP sorkara minister tura mi 28 a ruat belh chungchangah insawifiah tura hriattirna a pe. 

MP assembly speaker hlui N P Prajapati chu SC-ah hian zualkoin, tun hnaia Chouhan-a'n minister 28 a ruat thar chu India Danpui-a Article 164 (1A) kalh a nih thu a sawi. He Article-ah hian state-a council of minister zawng zawng chu chief minister telin Legislative Assembly-a member awm zat aṭanga 15% ai an tam tur a ni lo, tih a inziak a ni. He dan hi CM Chouhan chuan a bawhchhia niin N P Prajapati chuan a sawi. 

CM chhuak ta Kamal Nath kaihhruai Congress sorkar kha March thla khan MLA hel an awm avangin sorkarna siam zui thei loin paihthlak a ni a, hei vang hian BJP sorkar chu  a piangzui a, March 23 khan chief minister atan Chouhan hi lakluh a ni ta a ni. 

Chouhan hian April 21 khan a cabinet atan minister panga a ruat a, heng zingah hian Congress MLA hel, an party zawm tharte pawh an tel a ni. June 2 khan cabinet meeting hmasa ber chu neih niin he hunah hian minister 28 ruat belh tur thu an rel a ni. Minister a ruat belh zinga minister 20 chu cabinet rank an ni a, a dang minister 8 chu minister of state an ni thung. Chouhan minister-te hi vaiin 34 an tling ta a ni. Mahse tuna Madhya Pradesh Legislative Assembly member awm zat chu 206 niin, Danpuiin a tarlan ang chuan minister hi 31 aia tam an awm thei lo a ni.