JD(U)-in RJD zawm mai turin Sharad Yadav hrilh

Bihar-a rorellai, Janata Dal (United) chuan an party hruaitu hel, Sharad Yadav chu eptu pawl, Lalu Prasad-a party Rashtriya Janata Dal (RJD) zawm turin an hrilh.

Sharad Yadav-a’n a lamṭang pawl lam chuan JD(U) diktak zawk an ni tih sawi a, Election Commission hnena a zualkohna chu EC chuan document mumal a neih loh avangin a pawmsak lo a ni. Hemi hnu hian JD(U) thupuangtu Neeraj Kumar chuan Sharad Yadav hian politics lama inchiah zui zel a duh chuan a tan RJD zawm mai loh chuan dam khawchhuah theihna a awm tawh lo niin a sawi. Hei vang hian Sharad Yadav chu RJD zawm a, an party symbol-te pawmsak mai turin a ti. Yadav-a chuan a Rajya Sabha member nihna pawh a hloh thuai dawn niin a sawi bawk.

Neeraj Kumar chuan Sharad Yadav chu eiruk thubuai neih avanga Central Bureau of Investigation (CBI), Enforcement Directorate (ED) leh Income Tax department-in a chhuak mek, Lalu chhungkaw tan pawh ṭhianṭha a ni tawh a ni, a ti.

Sharad Yadav bakah JD(U) MP hel dang pakhat, Ali Anwar-te chu Rajya Sabha Chairman Venkaiah Naidu chuan hriattirna a lo pe tawh a, JD(U) an party laka an hel avanga MP an nihna disqualify tura an ngen chungchangah an dinhmun dik tak sawichiang turin a ti a ni.

JD(U) chuan Sharad Yadav hian August 27-a RJD hotu Lalu Prasad-an Patna-a “Desh Bachao BJP Bhagao” rally a huaihawtah a tel avangin amah leh amah chu JD(U) aṭangin a inban tawh niin a sawi. Hetih lai hian JD(U) hotu leh Bihar Chief Minister Nitish Kumar chuan party aṭanga hnawtchhuah a nih thu ala sawilang lo.

Chief Minister Nitish Kumar-a’n RJD leh Congress party nena an thawhhona, Grand Alliance chhuahsan a, BJP nena thawkduna sorkar thar a din avangin Sharad Yadav leh a lamṭangte an lungawi lo hle a, an party hi an phir zui a ni. JD(U) chuan August 12 khan Rajya Sabha-a an party hruaitu dinhmun aṭangin Sharad Yadav hi an lo ban tawh a ni.