MP-ah zirlaiten ‘Jai Hind’ tih hmang tawh dawn

Madhya Pradesh-a school hrang hrangah chuan October thla aṭang hian zirlai naupangten zirtirtute roll call chhanna atana “Yes Sir”, “Yes Madam” tih an hman ṭhin aiah “Jai Hind” tih an hmang tawh bawk.

Chief Minister Shivraj Singh Chouhan-a kaihruai BJP sorkar chuan “Jai Hind” tih hmantir an tumna chhan chu naupangte thinlunga ram hmangaihna tuh an duh vang a ni tih a sawi. He project hi Satna khawpuia school-a kalpui hmasak a ni phawt ang a, a hlawhtlin chuan state pumah hman chhunzawm a ni ang.

State School educaiton minister Kunwar Vijay Shah chuan he ruahmanan hi Chief Minister-in a pawmpui thu sawiin, hemi chungchanga hriattirna hi chanchinbu-ahte tihchhuah a nih thu a sawi.

Nikum February thla khan central sorkar hnuaia Kendriya Vidyalayas zawng zawnga an school compound chhungah nitin hnam puanzar zar tura tih an lo ni tawh bawk. Hnam puanzar hi hmun langsar lai, zirlaiten morning assembly an neih a pianga salute an pek theihna hmuna dah tura tih an ni. Hemi hma hian central university Vice Chancellor-te chuan an campus-a hnam puanzar zar an lo rel tawh bawk.