UK sorkarin Dawood Ibrahim-a bungrua hreksak

Kum 1993-a Mumbai khawpuia ṭum eng emaw zat bomb tihpuah avanga mi 260 thihna thlennaa mawhphurtua puh, India most wanted terrorist Dawood Ibrahim-a thil neihte chu UK sorkar chuan khawih chet theih lohin a hrek sak. UK sorkarin a rama Dawood Ibrahim-a hminga thil awm a hrek zingah hian Midlands-a a ram neih pawh a tel a ni.

Birmingham Mail-in a tarlan danin Dawood hian Warwickshire-ah hotel a nei a, hei bakah hian Midlands-ah in a nei bawk.

Kum 2015 khan Enforcement Directorate official-te chuan Midlands hi tlawhin, Dawood-a inte hi an enfiah a, a thil neihte pawh an mansak a ni.

Dawood-a hi 1993-a Mumbai-a bomb tihpuah a nih hnu khan a tlanchhe zui nghal a, tunah hian Pakistan ramah a biru mek nia hriat a ni. Mahse Pakistan chuan a ram chhungah a awm lo niin a sawi thung.

UK tablod Mirror chuan Dawood Ibrahim hi khawvela criminal zinga hausa ber dawttu a ni tih sawiin, amah aia hausa chu Colombian drug lord Pablo Escobar niin a tarlang. Dawood-a thil neih hlut zawng hi US dollar tluklehdingawn 6.7 vel nia chhut a ni a, hetih lai hian man a nih theih nana a chanchin hrilh theih hnenah lawmman dollar maktaduai 25 phal a ni.