PFI activist-ten Kerala-ah nawrh huaihawt

National Investigation Agency (NIA) kaihhruai state hrang hranga Islamic non-profit organisation, Popular Front of India (PFI) office leh pawl hruaitute chenna in dap a, an member eng emaw zat man an nih avangin PFI activist-te chuan Kerala-ah nawrh an huaihawt.

PFI hi ram chhunga firfiaka chetna thleng ṭhin thlawpa puh an ni a, hei vang hian state hrang hranga an office leh an pawl hruaitute chenna in chu NIA-te hian dapin, state police-ten an lo pui bawk a ni.

Central agency-te chet dan duh lohna lantirin Ningani khan Kerala-ah PFI acitivist-te chuan Kerala-ah nawrh an huaihawt a, nimin zing dar 6 aṭanga tlai 6 thlengin lungawi lohna an lantir zui leh bawk.

State chhunga district tin deuhthawah PFI activist-te chuan kawng zawhin, sorkar laipui leh investigating agency-te lakah an lungawi lohna thute an aupui a ni.

Central agency-in beihpui a thlaknaah hian PFI national, state leh district leader eng maw zat man an ni tawh. Man zingah hian Kerala-a PFI state president CP Mohammed Bahseer, national chairman OM A Salam, national secretary Nasaruddin Elamaram te pawh an tel.