Article 370 chungchanga petition thehlut SC-in ngaihtuah dawn hnai

Sorkar laipuiin kum 2019, August thlaa Jammu and Kashmir tana special status pekna, Constitution-a Article 370 a tihtawp chungchanga petition eng emaw zat lut chu Supreme Court chuan Ocotber thlaah a ngaihtuah tawh dawn.

Chief justice of India (CJI) Uday Umeh Lalit chuan petition lutte hi October thlaah, Dussehra vacation zawhah constitution bench-in a ngaihtuah tawh dawn tih nimin khan a sawi.

Dussehra vacation hmangin court hi October 3-10 chhung khar a ni ang.

Article 370 tihtawp chungchanga petition lutte hi judge panga awmna bench ngaihtuah tura tih ni mah se, a ngaihtuah tura tihte hian bench lian zawk kuta dah turin a ti a ni.

Petition thehluttu zingah hian National Conference lawmaker, bureaucrats hlui leh pawl eng emaw zat an tel. Article 370 tihtawp a nih chungchang bakah, sorkarin J&K state ṭhendarh a, union territory pahnih -Jammu and Kashmir leh Ladakh territory a siamna Jammu and Kashmir State Reorganization Act pawh an khing tel bawk.