Gandhi chhungkua aṭangin Congress President chuh tum awm lo

Congress party president thar thlan turah, Gandhi chhungkua aṭangin tumahin chuh an tum lo tih party hruaitu, Rahul Gandhi chuan a tichiang tawh niin Rajasthan chief minister Ashok Gehlot chuan a sawi.

Ashok Gehlot chuan Rahul Gandhi hi kum 2019 Lok Sabha inthlanpui neih zawha party president a nihna aṭanga a ban hnu khan vawi tam tak Congress president-a awm leh tura rawtna chu pawm turin a ngen tih a sawi. Mahse Rahul hian a hnar zel a, tun ṭuma inthlan turah pawh Gandhi chhungkaw zingah party hruaitu dinhmun chuh tum an awm lo tih a sawichiang leh a ni, a ti.

Congress party president thlan turah hian Gehlot chuan chuh a tum tih a sawichiang tawh a, nomination paper pawh a thehlut thuai dawn tih a sawi. Ram chhung dinhmun thlirin, eptu party chak tak a awm a ngaih thu a sawi. Party president thlan turah hian union minister hlui, Shashi Tharoor pawhin chuh a tum bawk.

Gehlot hian Congress President chuh a tum vang hian Rajasthan Chief Minister a nihna aṭangin ban pawh a remti tawh a ni. A hma chuan party president a nih pawhin CM nihna chelh chhunzawm zel a tum thu a sawi a, mahse Rahul Gandhi-a'n party hotu chuan 'one man one post' a zawm a ngai tih a sawi hnuah, CM aṭanga ban hi a remtih thu a sawi leh a ni.

Party president thlan tur hian boruak a nei lian chho hle. Nimin khan AICC general secretary in-charge Communications Jairam Ramesh chuan an party thupuangtu zawng zawng leh, communication department-a office bearer-te chuan inthlan chuh tumte chungchang leh an chanchinte sawi chhuak lo turin a ti. Ramesh chuan inthlan chuh tumte tan party thuneitu sang lam aṭangin pawmpuina hmuh kher a ngai lo tih sawiin, inthlanna felfai leh thianghlim tak neih a ni dawn a ni, a ti. He thu hi party thupuangtu zinga pakhat, Gourav Vallabh-a'n Ashok Gehlot thlawp zawnga thu a sawi hnuah Ramesh hian he hriattirna hi a tichhuak a ni.