Modi leh Abe-te’n bullet train project lungphum phum

Prime Minister Narendra Modi leh India rama cham mek, Japan Prime Minister Shinzo Abe-te chuan nimin khan Gujarat-ah India rama bullet train project hmasa ber tur lungphum an phum.

Bullet train poject atan hian cheng vaibelchhe nuai 1.1 rua­hman a ni a, Indian Railways leh Japan firm Shinkansen Technology-te’n an thawk dawn a ni. Japan team chuan bullet train hmasa ber chu kum 2023 ah tlantir tum a nih thu a sawi a, mahse Railways Minister Piyush Goyal chaun PM Modi-an India-in indespendence kum 75-na a lawmna, August 15, 2022-ah tlantir hman a duh niin a sawi.

Project thawhna senso zinga 81% hi Japan hi a tum dawn a, hei hi soft loan, a interest rate 0.1% in a pe dawn a, loan hi kum 50 chhunga rulh tur a ni ang.

Bullet train hmasa ber hi Gujarat-a Ahmedabad leh Mumbai inkara tlantir a ni dawn a, khualzin 750 a phur thei ang. Gujarat leh Mumbai inkara hun hman ṭhin, darkar riat chu bullet train-a kal chuan station awm zawng zawng 12-ah a chawlh vekin darkar thumah a tlahniam ang a, station pali-ah chauh a chawlh chuan darkar hnih chauh hun hman a ni dawn a ni. Bullet train tlanchak zawng hi chawhrualin darkar khata km 250-a chak niin, a chak lai ber chuan darkar khata km 320 a ni ang. India rama rel tlan lai zinga chak ber aiin a speed hi letin a chak dawn a ni.

Gujarat leh Mumbai inkar hi km 508-a thui niin, heng zinga 6% chu leiverh chhung niin, a bak chu leiah siam a ni. Bullet train hian ram chhunga leiverh thui ber, km 21-a thui chu a zawh tel dawn a ni. He leiverh zinga km 7-a thui chu Maharashtra-a Thane bula tui hnuaiah siam a ni ang. Maharashtra sorkar chuan Mumbai-a bullet train din tirna tur hi a la tifel lo. Narendra Modi leh Shinzo Abe-te hian nimin khan Gandhinagar-a Dandi Kutir an tlawh nghal bawk. He hmun hi Mahatma Gandhi chanchin leh a zirtirna puala India rama museum siam awmchhun a ni.