Rohingya raltlante chhawmdawlna pe

Sorkar laipui chuan Myanmar aṭanga Bangladesh rama tlanchhia, Rohingya Muslim-te tana chhawmdawlna pekna tur, Operation Insaniyat chu nimin aṭang khan a kalpui ṭan.

Myanmar security force-te’n an rama Rakhine state-a Rohingya helte lakah beihpui an thlak avangin Rohingya mi tam tak chu an tlanchhia a, August 25-a beihpui thlak a nih aṭang khan Rohingya mi nuai li dawn chu Bangladesh ramah an tlanchhe tawh a ni.

Rohingya raltlante tan hian India chuan buhfai, chini, chi, tel, thingpui fe, noodle, biscuit, thosilen bakah an nitin khawsakna atana mamawh dangte a thawn a, chhawm­dawlna a thawn hmasak ber chuan nimin khan Chittagong a thleng tawh a ni. Hemi chungchangah hian external affairs ministry chuan thuchhuah siamin, Bangladesh-in harsatna a tawhah India chuan rang takin a theih angin a pui ṭhin a, India leh Bangladesh mipuite inzawmna leh inpawhna ṭha tak neih­te chu a vawng nung tlat a ni. Raltlan tam tak an luh avanga Bangladesh-in harsatna a tawh a, puih a mamawhna a pianga pui turin India chu a inring reng a ni, a tibawk.