Nepal-ah Honeypreet a tlanchhia

Haryana police-te chuan man tuma an zawn mek, Dera Sacha Pauda pawl hotu, Gurpeet Ram Rahim Singh-a'n fa atan a lak, Honeypreet-i chu Nepal ramah a tlanchhe hman nia an hriat thu an sawi.

Police-te chuan Dera Udaipur in-charge, Pradeep Goyal chu Rajasthan-ah an man tawh a, thu an zawhfiahna aṭangin Honeypreet-i awmna hrilhin, Nepal ramah a tlanchhia tih a hrilh niin an sawi. Pradeep hi kar kalta Inrinni khan Udaipur-ah man a ni a, Panchkula-ah hruai a ni tawh.

Pradeep hi CBI court-in Dera hotu Ram Rahim-a thiam loh a chantir ni khan Panchkula-a mipui ko khawm tura hriattir a ni a, Ram Rahim-a chuan mi a koh khawm mamah mi pakhatah Rs 25,000 zel pek a tiam tih a sawi bawk.

Honeypreet-i hi Dera pawl hotu pawimawh, Ram Rahim-a thachhang dawltu ber nia sawi a ni. Ram Rahim-a film siamah a inlan vek bakah, social function-a Ram Rahim-a telna apiangah pawh a inlan ve ziah a ni. A hnen aṭang hian an pawl kalphung leh inkaihhruai dan te hriat theih beisei a ni. Mahse Ram Rahim-a man a nih hnu hian chin hriat lohin a bibo zui nghal a ni.