Gorakhpur tragedy : Oxygen supplier man

Uttar Pradesh-ah Gorakhpur-a Baba Raghav Das Medical College-a thla khat chhunga naupang tam tak thihna thleng chhuina kalzelah nimin khan hospital tana oxygen supply tu, Pushpa Sales neitu chu man a ni.

Thla hmasa khan Baba Raghav Das Medical College-ah hian oxygen tlakchham avangin naupang damlo enkawl lai 60 chuang an thi a ni. He thihna thlenna chhan hi hospital-in oxygen supply bill a bat avangin a supplier hian a pek chhunzawm duh loh vang nia sawi a ni.

Hetih lai hian state sorkar chuan naupang tam tak thihna thlenna chhan hi oxygen tlak­chham vang a ni lo tih a sawi thung.

Hospital-a thihna thleng chungchang chhui tur hian Chief Secretary Rajive Kumar kaihhruai committee din a ni a, FIR pawh thehluh a ni tawh a ni. FIR thehluha hming tarlan mi pakua chu man an ni tawh a ni.

Gorakhpur SP, Anirudh Sidhartha Pankaj chuan Pushpa Sales neitu, Manish Bhandari chu Pathianni zing dar 8 vel khan Deoria-ah man a nih thu a sawi. Bhadari hi medical examination neihpui nghal niin, thu zawhfiah a ni dawn tih a sawi bawk. Hemi hnu hian local court-ah hruai a ni ang.

Hospital-ah naupang tam tak thihna thleng chungchang sawichhuah a nih hnu hian Bhandari hi a bibo zui nghal a, September 15 khan anti-corruption court chuan a thil neihte hi khawih chet theih lohin a hrensak a ni.