Chandigarh Airport hming Bhagat Singh hming chawiin thlak dawn : PM

Prime minister Narendra Modi chuan thla tina radio programme a hman ṭhin, Mann Ki Baat chu nimin khan a hmang leh a, India zalenna sualtu, Saheed Bhagat Singh zahna leh chawimawina lantirna atan Chandigarh Airport chu a hming chawia thlak a ni dawn tih a sawi.

Punjab-a Aam Aadmi Party (AAP) in sorkar an chan hnuah, Bhagat Singh chawimawina hi lantirin, chief minister Bhagwant Mann lakluh inkhawm pawh Bhagat Singh-te khua, Khatkar Kalan-ah buatsaih a ni. CM Mann chuan ram tana Bhagat Singh-a martar ni, March 23 chu state pumah kum tin public holiday-ah hman a ni tawh dawn tih a puang zui bawk.

AAP leh BJP-te inepna nasa tak awm chho mekah, BJP chuan Bhagat Singh chawimawina tur hi a rawn duang chho ve leh a, airport hming chawitir a ni dawn tih PM Modi chuan a rawn puang ve leh a ni.

Prime Minister chuan climate change chuan marine ecocystem dinhmun a tihderthawn thu leh, tuipui kama bawlhhlawh tam tak awm ṭhin chu thil hmuh hrehawm leh ṭha lo tak a nih thu a sawi. Leilung vawnfai leh enkawl ṭhat chu mi tin mawhphurhna a nih thu pawh a sawi a, leilung humhalhna atan mipute chu tualchhung siam, non-plastic bag chauh hmang ṭhin turin PM chuan a chah bawk a ni.