Punjab Governor-in Sept 27-a Assembly session neih a remti

Punjab-a AAP sorkar leh governor Banwarilal Purohit-te inkara Legislative Assembly special session koh chungchanga inhmuhthiam lohna a awm hnuah, Govenor chuan September 27-ah Vidhan Sabha sesison neih a remti ta.

Governor hian AAP sorkarin session ko tura an duhna chhan an sawi chungchang chu pawmin, session koh hi a remti ta nia sawi a ni. Session koh a remtih tak hnuah Governor leh Chief Minister Office-a official-te chuan meeting an nei zul nghal a ni.

Session-ah hian thlai ro hal chungchang te, Goods and Services Tax leh power supply chungchang chu ngaihtuah tur zingah a tel tih state assembly secretary chuan a sawi. Session-ah hian AAP sorkar hian confidence motion putluh a tum dawn em tih erawh sawichian a ni lo.

Punjab-a AAP sorkar hian BJP chu sorkar paihthlak tuma hma la leh, AAP MLA ṭhenkhat sum tam tham hmanga thlemchhuah tumah a puh. Hei vang hian CM Bhagwant Mann kaihhruai AAP sorkar chuan sorkar rintawkna motion put luh a nih theihna atana special session a ko a ni. Mahse special session neih tumna hi chawpchilh takin Governor chuan a sût sak a, hei hi AAP chuan na takin an sawisel zui a ni.