Rohingya-te hi ram himna tiderthawng thei an ni : Sorkar laipui

Srokar laipui chuan Supreme Court hnena India rama Rohingya Muslim lutte an rama thawnkir a tum chung­changa nimina a sawifiahnaah, Rohingya te chu India ram himna tiderthawng thei an nih thu leh, India ramah dan loa lut an nih thu a sawi.

Supreme Court-ah sorkar laipuiin affidavit a thehluhah, Rohingya Muslim ṭhenkhat chu Pakistan ISI bakah Islamic State (IS) firfiak pawl nena inzawmna nei an nih thu a tarlang. Affidavit, phek 15-a chhahah hian Myanmar, West Bengal leh Tripura-ahte India rama dan loa Rohingya-te rawn luhna tur buaipuitu an awm thu tarlan a ni bawk.

Sorkar laipui chuan Rohingya Muslim-te Myanmar rama thawnkir a tum chung­chang duh lo a petition lut hrang hrangte chhang tura hun pek chu pawhsei sak turin court a ngen a, court hian October 3 thleng hun a pekbelh a ni.

UN Human Rights hotu Zeid Ra’ad al-Hussein chuan Myanmar rama Roghingya-te chungah tawrhna nasa tak a thlen mek laiin, India rama Rohingya lutte thawnkir tuma hma lak a ni chu a sawisel a, mahse hei hi chhangin, sorkar laipui chuan ram himna tiderthawng thei, dan loa pem lut chungchang chu ngaihven a ngai a ni, a ti.

Union minister Kiren Rijijru chuan sorkar laipuiin Rohingye raltlante thawnkir a tum chu ram himna tur a ngaihtuah vang a ni tih a sawi. Rijiju hian September 5 khan Rohingya-te chu dan loa India rama lut an nih thu leh, an rawn kalna ramah thawn kir leh a ṭul thu alo sawi tawh bawk a ni.