Madras HC-in AIADMK MLA-te ngenna ngaihtuah dawn

Tamil Nadu Assembly Speaker P Dhanpal-a’n rorellai AIADMK MLA hel 18-te chu Chief Minister Edappadi K Palaniswami an thlawpna an hnuhdawh avangin anti-defection law hnuaiah MLA an nihna aṭangin a ban a, mahse MLA-te hian Madras High Court-ah Speaker thutlukna siam hi an khing let a ni.

Madras High Court chuan AIADMK MLA 18-te’n ban an nih chungchang a rang thei anga ngaihtuah tura an ngenna chu remtihsakin, vawiin hian a ngaihtuah dawn a ni.

High Court-a ngenna an thehluhah, MLA-te chuan dik lo taka ban an nih chungchang thu chu ngaihtuah thuai a nih loh chuan, CM Palaniswami kaihhruai sorkar fiah a nih hunah vote an thlak tur thlengin a nghawng dawn a ni, an ti.

Tamil Nadu-a rorellai AIADMK hnuaia pawl pahnih, CM Palaniswami leh CM hlui O Panneerselvam lamṭang pawlte chuan inremna siamin an inchhunfin a, VK Sasikala-i leh a vahpa,TTV Dhinakaran-te chu party hruaitu an nihna an hlihsak nghal bawk a ni. AIADMK MLA zinga Dhinakaran-a thlawptute chuan Panneerselvam-a lamṭangte nena inchhunfin hi duh loin, thla hmasa khan Dhinakaran leh MLA 18 te chuan Governor Vidyasagar Rao hmuin, CM an thlawpna an hnuhdawh thu an hrilh a ni.

Nimin khan Tamil Nadu Governor chuan Union Home Minister Rajnath Singh hmuin, state chhunga politics dinhmunte a hrilh. Hruaitu pahnihte hi minute 20 chhung an inkawm a ni.