School himna enfiahtu tur panel din

Sorkar laipui chuan Gurgaon-a school compound chhungah zirlai pakhat rawng taka thah a nih hnuah, ramchhunga school hrang hrangten naupangte himna tura an hmalakna enfiahtu tur inte-ministerial committee din a tum.

Thawhṭanni-a Union HRD minister Prakash Javadekar leh WCD minister Maneka Gandh-te’n meeting an neihah committee din hi an rel a ni. School hrang hranga safety measure kalpuina tur chu Nirbhaya fund aṭanga pek an rawt bawk.

Meeting zawha chanchinthar lakhawmtute a kawmnaah, Maneka Gandhi chuan,”School safety measure hman mekte chu enawnin, rawt­na thar siam a ni. Inkaihhruaina siamte kalpui dan enfiah tur hian secretary paruk awmna committee din a ni dawn a ni”, a ti.

Committee-ah hian Human Resource Development, Women and Child Development Ministry, Tribal Affairs, Minority Affairs, Social Justice and Empowerment leh Drinking water and sanitation secretary-te dah an ni ang a, anni hian school himna tura inkaihhruaina te siamin, hman a nih hun turte an ruat nghal dawn a ni.