Dawood-a unaupa man

India most wanted underworld gangster Dawood Ibrahim-a unaupa, Iqbal Kaskar chu Thawhṭanni zank han Central Mumbai, Nagpada area-a a chenna in aṭangin man a ni.

Iqbal Kaskar hi encounter specialist leh anti-extortion cell’s senior police inspector Pradeep Sharma-a kaihhruai team-in an man a, Thane-a sumdawng pakhat hnena telephone hmanga sum pe tura vau a nih kaihhnawihah man a ni. Kaskar bakah hian midang pahnih pawh manin, mi panga hren an ni bawk a, an vai hian Police Commissioner’s office-ah hruai nghal an ni.

Thane Commissioner of Police Parambir Singh chuan Kaskar leh politician leh sumdawng liante inzawm dan an chhui chiang mek tih a sawi. “Dawood hmingin vauna hi siam a ni ṭhin a, mipuite vau turin Bihar-a silai kapthiamte chhawr an ni bawk. Hetianga sum dila invaunaah hian politician leh sumdawnge pawh an inrawlh ṭhin a, hei hi chhuizui mek a ni”, tiin Parambir Singh chuan a sawi. Iqbal Kaskar-a chetnaah hian Dawood Ibrahim hi tel ve em tih pawh an chhui tih a sawi bawk.

Iqbal Kaskar hi kum 2003 khan United Arab Emirates aṭangin India ramah thawn a ni a, tualthah thubuai leh dan loa in sak thubuaiah man tuma zawn a ni a, mahse kum 2007 khan heng a thubuai pahnihah hian thiam chantir a ni.